En la parte superior central aparece el Escudo del Vaticano, y en la parte superior derecha sello de Registro de Entrada del Arzobispado de Mérida-Badajoz con nº de Registro de Entrada 2115/602 con fecha 18 de diciembre de 2015
Documento original (en breve expondremos el documento con mejor resolución)
PAENITENTIARIA APOSTOLICA
Prot. N. 839/15/I
BEATISSIME PATER
David Martinez Gutierrez, Parochus de Llerena Paroeciae, sub tit. Nostrae Dominae v. d. de la Granada, intra fines Archidioeceseos Emeritensis Augustanae Pacensis exstantis, in notitiam refert paroecialem communitatem sese apparare ut digne celebretur quinquagesimus anniversarius dies, ex quo aureo diademate redimetur sacra effigies caelestis Patronae. Qui quidem pius proximus eventus ut digne recipiatur, opportuna suppeditabitur catechesis et mediorum sanctificationis, prae primis Ss.mae Eucharistiae et Paenitentiae sacramentorum copia, unde sperare licet fructus vitae Fide, Spe et Caritate informatae ad Evangelii normam, perfectius usque ducendae. Quamobrem peculiares sacrae functiones, peregrinationes aliaque devotionis ac religiosae doctrinae incepta enixe promovebuntur. Quo autem christifideles uberiores fructus spiritales ex his marianis celebrationibus hauriant, Orator Indulgentiarum implorat donum ad instar Iubilaei consequendum. Et Deus, etc.
Die XVIII Decembris MMXV
PAENITENTIARIA APOSTOLICA, de Ss. mi Patris Francisci mandato, Marianum libenter concedit Annum Iubilarem cum adnexa plenaria Indulgentia, suetis sub condicionibus (sacramentali confessione, eucharistica communione et oratione ad mentem Summi Pontificis) a christifidelibus vere paenitentibus et caritate compulsis semel in die lucranda, quam etiam animabus fidelium in Purgatorio detentis per modum suffragii applicare possint si, unito corde cum spiritalibus finibus Anni Misericordiae Sancti, imaginem B. Mariae Virg. de la Granada in forma peregrinationis inviserint et ibi sacris ritibus, de consensu Exc. mi Episcopi determinandis, pie interfuerint, vel saltem per congruum temporis spatium preces Deo effuderint pro Hispaniae fidelitate ad christianam vocationem, pro sacerdotalibus atque religiosis impetrandis vocationibus et pro defendendo humanae familiae instituto, concludendum Oratione Dominica, Symbolo Fidei atque invocationibus B. Mariae Virginis.
Senes, infirmi, omnesque qui gravi causa domo exire nequeunt, pariter plenariam consequi poterunt Indulgentiam, concepta detestatione cuiusque peccati, et intentione praestandi, ubi primum licuerit, tres consuetas condiciones si, coram aliqua parva caelestis Patronae imagine, iubilaribus functionibus se spiritaliter adiunxerint, precibus ac doloribus suis vel incommodis propriae vitae misericordi Deo per Mariam oblatis.
Quo igitur accessus, ad divinam veniam per Ecclesiae claves consequendam, facilior pro pastorali caritate evadat, haec Paenitentiaria enixe rogat Parochus, cum presbyteris legitime adprobatis, prompto et generoso animo celebrationi Paenitentiae sese praebeat ac Sanctam Communionem infirmis saepe ministret.
Praesenti totum per Marianum Annum valituro, dummodo Exc.mo Archiepiscopo rite ostensum fuerit. Contrariis quibuslibet non obstantibus.
(firma en la parte central de MAURUS Card. PIACENZA Paenitentiarius Maior)
(firma en el lado derecho de CHRISTOPHORUS NYKIEL Regens)
HOJA Nº 2
PAENITENTIARIA APOSTOLICA
Prot. N. 840/15/I
DECRETUM
PAENITENTIARIA APOSTOLICA, vi facultatum sibi specialissimo modo a Sanctissimo in Christo Patre et Domino Nostro, Domino Francisco Divina Providentia Papa tributarum, Excellentissimo ac Reverendissimo Domino Celso Morga Iruzubieta, Archiepiscopo Metropolitae Emeritensi Augustano-Pacensi, vel de eius consensu alii Praelato episcopali dignitate insignito, benigne concedit ut, in quinquagesimo aniversario, ex quo imago Nostrae Dominae de la Granada coronata est, die pro fidelium utilitate eligendo, post litatum Divinum Sacrificium in ipso paroeciali de Llerena templo, impertiat omnibus christifidelibus adstantibus, qui vere paenitentes et caritate compulsi iisdem interfuerint sacris, papalem Benedictionem cum adnexa plenaria Indulgentia, suetis sub condicionibus (sacramentali confessione, eucharistica communione et oratione ad mentem Summi Pontificis) lucranda.
Christifideles qui papalem Benedictionem devote acceperint, etsi, rationabili circumstantia, sacris ritibus physice non adfuerint, dummodo ritus ipsos, dum peraguntur, ope instrumenti televisifici vel radiophonici propagatos pia mentis intentione secuti fuerint, plenariam Indulgentiam, ad normam iuris, consequi valebunt.
Contrariis quibuscumque minime obstantibus.
Datum Romae, ex aedibus Paenitentiariae Apostolicae, die XVIII mensis Decembris, anno Dominicae Incarnationis MMXV.
(firma en la parte central de MAURUS Card. PIACENZA Paenitentiarius Maior)
(firma en el lado derecho de CHRISTOPHORUS NYKIEL Regens)
